வ.வா.ச தொண்டனின் பதில்

நான் இந்த பதிவை எழுதுவது ஒரு பொறை கடையிலிருந்து, ஆகவே இங்கு ஓடும் பாட்டுக்களும், வசனங்களும் எனது பதிவில் தெரிந்தால் அதற்க்கு நான் பொறுப்பல்ல.

***

வ.வா. சங்கத்தின் மிக முக்கியஸ்தரான அக்கா ஆற்றலரசி பொன்ஸ் அவர்கள் சங்கத்துக்கு வந்ததாக கூறப்படும் ஒரு கடிதத்துக்கு பதில் சொல்லும் பதிவில், நான் இதுகாறும் அரசியல், பொது வாழ்வு, மக்கள் தொண்டு, இலக்கிய பணி, உருவாக்க சிந்தனை, பொருளாதார மேம்பாடு, இன்னும் என்னிலடங்காத்துறைகளில் நான் பெற்றிருந்த இடத்தை ஒரே நாளில் புல்டோசர் கொண்டு இடிக்கும் விதத்தில் இருப்பதாக சங்கத்தின் சில முக்கியஸ்தர்கள் கருதுவதால், இந்த அறிக்கையை சங்கத்தின் தூண் என்று சொன்னாலும் கூட சங்கபலகையில் இடம் / அனுமதி மறுக்கபட்ட நிலையில் நானே எனது சொந்த செலவில், எனது சொந்த ஊடகத்தில் வெளியிடும் கட்டாயத்துக்கு தள்ளபட்டுள்ளேன்.

ஓராயிரம் ஆண்டுகள ஆகட்டுமே !
நம் பொறுமையின் பொருள் மட்டும் விளங்கட்டுமே !

பகுத்தறிவு பிறப்பதெல்லாம் கேள்விகள் கேட்பதானாலே

***





காய்ந்து போன பிட்சா, பர்கர், சூடான நாய் தான் உணவு என்று வருத்ததுடன் கூறும் அக்கா அவர்கள், கடந்த மாதம் மெக்டி பில் தொகையாக சில மில்லியன்களை சங்க நிதியிலிருந்து அடைத்தது ஏன் ?

வந்ததாக கூறப்படும் அந்த கடிதத்தின் ஒரிஜினல் எங்கே ?. அதிலிருந்தது அக்கா அவர்களின் கையெழுத்தை போலவே இருந்தது எனறு கூறப்பட்ட அந்த முக்கிய ஆவணங்கள் எங்கே ?

எனக்கு கொடுக்கபட்டுள்ள புதிய பெயரின் முன்னால் உள்ள அடைமொழியின் புரிதல் என்னவென்று விளக்கவேண்டும் என்ற எனது கோரிக்கை காற்றிலே கரைந்து போன மாயம் என்ன ?

கணக்கு கேட்கும் தலமையே "கண்களைத் திறந்து பார்..கண்ணாடியைத் துடைத்துப் போட்டுப்பார்.." என்று தனி மனித தாக்குதலில் இறங்கியது ஏன் ? சங்கத்தின் சிங்கங்கள் எல்லாம் கொள்கைகளால் கட்டுண்ட இமயங்கள் என்ற உண்மையை மறந்து தனது புதரக பயணத்தினால்தான் என்று தனி மனித புகழில் இறங்கியது ஏன் ?

வெண்பா என்று ஒரு பாடத்தை நடத்தி தமிழ் பரீட்சைக்கே பிட் அடித்த தல கைப்புவை நொந்து போக வைத்தது, எதிர் கட்சிகளின் தூண்டுதலினால்தானா என்ற நியாயமான கேள்விக்கு பதில் எங்கே ?

புதரகத்தில் தனியொருவானாக இட்லி செய்வது எவ்வளவு கடினம் என்று அறிந்திருந்தும், தோசை மட்டுமே சுடும் பேராசிரியர் என்று எள்ளி நகையாடுவது ஏன் ?

அனைத்திலும் மேலாக இவ்வாறு கேள்விகள் கேட்டால் நான் எதிர் கட்சிக்கு தாவிடுவேன் என்று தலமையை மிரட்டுவது எந்த வகை நியாயம் ?